Í guðanna bænum!

War Horse ** (2 stjörnur)
Leikstjórn: Steven Spielberg
Leikarar: Jeremy Irvine, Emily Watson, Peter Mullan, David Thewlis, Benedict Cumberbatch, Tom Hiddleston, Eddie Marsan, Toby Kebbell, Niels Arestrup

Steven Spielberg heldur sig innan þægindarammans í nýjustu kvikmynd sinni War Horse, en hún er byggð á samnefndri barnabók sem varð síðar að leikriti. Ég ímynda mér skemmtilegt barnaleikrit þar sem tvær manneskjur leika titilhlutverkið, sjálfan stríðshestinn, önnur framhlutann og hin þann aftari. Spielberg splæsir þó í alvöru hesta í myndina sína en útilokar um leið alla möguleika hlutverksins á verðlaunatilnefningum, en kvikmyndin hefur þrátt fyrir það fengið margar slíkar.

Það er í raun óskiljanlegt því War Horse er ekki góð kvikmynd. Hún er afskaplega fallega tekin af Janusz Kamiński, tökumanni leikstjórans til margra ára, og vísar myndatakan til skiptis í John Ford og til fjölskyldumynda í Technicolor. Sagan er hins vegar ein stór melódramatísk klisja sem reynir hvað hún getur að framkalla tár á hvarmi áhorfandans og takist henni það ekki ein síns liðs kemur innantóm kvikmyndatónlistin eftir John Williams til aðstoðar, rétt eins og óvinahermaðurinn sem kemur hlaupandi með vírklippur og hjálpar „góða“ hermanninum að losa sárþjáðan fákinn úr gaddavírsflækju.

Þetta atriði endurspeglar Spielberg eins og hann gerist allra verstur. Senan á að hreyfa við okkur tilfinningalega vegna þess að allir hjálpa særðu dýri, meira að segja svarnir óvinir með riffla í lúkum, því að í stríði er það jú stríðið sjálft sem er óvinurinn. Hvernig myndi „give me a break“ útleggjast á íslensku? Hlægilegast er þó líklega atriðið þar sem aðalhesturinn fórnar sér fyrir þreyttan vin sinn, sem einnig er hestur, og tekur það á sig að draga níðþunga fallbyssu upp fjallshlíð.

Steven Spielberg er þekktasti núlifandi kvikmyndaleikstjóri heims og hans bestu myndir eru sannkallaðar perlur. Af hverju gerir hann ekki merkilegri hluti en þetta? Og hví er honum ekki refsað fyrir syndir sínar? Þvert á móti fær myndin sex tilnefningar til Óskarsverðlauna og fimm til BAFTA. Er þetta falin myndavél? Er Auddi Blö að sprella í okkur?

Niðurstaða: Kvikmyndir fyrir börn eru af hinu góða en barnaleg kvikmyndagerð er það ekki. War Horse er snotur en alveg innantóm.

Birt í Fréttablaðinu 4.2.2012

Auglýsingar

4 svör to “Í guðanna bænum!”

  1. Eiríkur Fannar Jónsson Says:

    Hafi einhver áhuga á að sjá hvernig hesturinn var útfærður í leikritinu þá er mjög áhugavert myndband um það hér: http://www.ted.com/talks/handpring_puppet_co_the_genius_puppetry_behind_war_horse.html

  2. Jói Hermanns Says:

    Sá trailerinn fyrir þessa mynd og varð umsvifalaust ótrúlega lítið spenntur. Tel mjög ólíklegt að ég sjái hana einhvern tímann. Horfi bara aftur á Piranha 3D.

  3. Svo er þessi mynd líka tveir og hálfur tími. Það er óþolandi!

  4. […] einhverjum fýlupúka á Fréttablaðinu fannst um einhverja djöfuls mynd um einhvern djöfuls hest. Share this:FacebookLike this:LikeBe the first to like […]

Færðu inn athugasemd

Skráðu umbeðnar upplýsingar að neðan eða smelltu á smámynd til að skrá þig inn:

WordPress.com Logo

You are commenting using your WordPress.com account. Log Out / Breyta )

Twitter picture

You are commenting using your Twitter account. Log Out / Breyta )

Facebook photo

You are commenting using your Facebook account. Log Out / Breyta )

Google+ photo

You are commenting using your Google+ account. Log Out / Breyta )

Tengist við %s

%d bloggurum líkar þetta: